Засгийн газрын Шадар сайд асан Чойжилсүрэнгийн Пүрэвдорж

Төр, нийгмийн зүтгэлтэн, Монгол улсын Засгийн газрын шадар сайд (1990-1996) асан Чойжилсүрэнгийн Пүрэвдорж нь 1948 онд Архангай аймгийн Мөрөн сум буюу одоогийн Тариат сумын нутагт “Хөтөл” гэдэг газар малчин эцэг Жалцавын Чойжилсүрэн, эх Янпилын Пунсал нарын отгон хүү болж төрсөн.

1955-1959 онд Архангай аймгийн Мөрөн сумын бага сургуульд элсэн сурч байгаад 1959 оны 9 дүгээр сараас Өндөр-Улаан сумын 7 жилийн дунд сургуульд шилжин суралцаад 1962 онд төгссөн. Тэр ондоо Тариат сумын 10 жилийн сургуульд дэвшин суралцаад 1965 онд онц сайн төгссөн байна.

1965-1970 онд тухайн үеийн ЗХУ-ын Свердловск хотын (өнөөгийн ОХУ-ын Екатеринбург хот) С.М.Кировын нэрэмжит Уралын Политехникийн (УПИ) дээд сургуульд суралцаж төгсөөд “Цахилгааны инженер” мэргэжил эзэмшсэн.

1970 оны 8 дугаар сараас 1980 он хүртэл Улаанбаатар хотын 3 дугаар Цахилгаан станцад цахилгааны цехийн ээлжийн даргын дагалдан, цахилгааны нарийн хэмжүүрийн техник, цахилгаан техникийн лабораторын реле хамгаалалт цахилгаан автоматикийн инженер, лабораторийн эрхлэгч, цехийн ахлах инженер, үйлдвэр хариуцсан орлогч дарга хүртэл дэвшин ажилласан.

1979 онд МАХН-д элссэн байна. 1980 оны 8 дугаар сараас БНМАУ-ын Түлш, эрчим хүчний үйлдвэрийн яамны Төвийн эрчим хүчний системийн ерөнхий инженерээр ажилласан. 1983 оноос БНМАУ-ын Түлш эрчим хүчний үйлдвэрийн яамны орлогч сайдын албыг хашсан. 1987-1990 онд Эрчим хүч, уул уурхайн үйлдвэр, геологийн яамны орлогч сайдаар ажилласан. 1990 оны 5 дугаар сараас БНМАУ-ын Сайд нарын Зөвлөлийн орлогч дарга, мөн 1990 оны 9 дүгээр сараас Засгийн газрын Шадар сайдаар ажилласан.

1992-1996 онуудад Архангай аймгаас Монгол Улсын УИХ-ын гишүүнээр сонгогдож, Монгол Улсын Засгийн газрын Шадар сайдаар томилогдон ажилласан. Энэ хугацаанд тэрээр Улсын Онцгой Комиссын даргаар давхар ажиллаж байжээ.

1996 оны УИХ-ын сонгуульд Архангай аймгийн тойрогт Р.Гончигдоржид ялагдсан юм. Түүнээс хойш ажилгүй байж байгаад 1998 оны 10 дугаар сарын 1-нд хүнд өвчний улмаар нас барсан.

1990-1996 оны Монгол Улсын улс, төр нийгэм, эдийн засгийн шилжилтийн хүнд хэцүү үеийг даван туулахад онцгой үүрэг гүйцэтгэн ажилласан эгэл даруухан төрийн зүтгэлтэн гэж монголын ард түмэн үнэлдэг.

Түүний гавьяа зүтгэлийг үнэлж Монгол Улсын Төрийн дээд шагнал одон медаль хүртээхээс гадна Архангай аймгийн Тариат сумын дунд сургуулийг 2004 онд Монгол Улсын Шадар сайд Ч.Пүрэвдоржийн нэрэмжит болгож мөнхөлсөн юм.

Гэр бүлийн байдал:

Гэргий Ч.Батбаяр, 4 хүүхэдтэй /охин П.Мягмарцогт, охин П.Батцогт, хүү П.Цогтгэрэл, охин П.Нансал/

Түүнд зориулсан шүлэг:

Ар халхын тэнүүнд Арын сайхан хангай гэж бий

Тэр сайхан хангайд Тэрхийн цагаан нуур гэж бий

Тэвхэлсэн нумнаас тавьсан юм шиг

Тэнгэрийн мөнгөн заадас шиг

Суман гол зүсэн бий

Усан дундуур нь ус харван урсдаг

Урьд эртийн цагт

Уул нь галаар оргилдог

Тунгалаг гурван Тамир